வானிலை ஆய்வு திணைக்களம் இன்று (24) வெளியிட்டுள்ள அறிக்கையில், தென்மேற்கு பருவமழை நாட்டில் மெதுவாக நிலைபெற ஆரம்பித்துள்ளதாக தெரிவிக்கப்பட்டுள்ளது.
மேற்கு, சபரகமுவ மற்றும் வடமேற்கு மாகாணங்கள் மற்றும் காலி, மாத்தறை, கண்டி, நுவரெலியா மாவட்டங்களில் இடைக்கிடையே மழை அல்லது இடியுடன் கூடிய மழை பெய்யும் என எதிர்பார்க்கப்படுகிறது. சில பகுதிகளில் 50 மில்லிமீட்டருக்கும் அதிகமான கனமழை ஏற்படக்கூடும் எனவும் எச்சரிக்கை விடுக்கப்பட்டுள்ளது.
மற்ற பகுதிகளில் பொதுவாக வானிலை சீராக இருக்கும் எனவும் குறிப்பிடப்பட்டுள்ளது.
மேற்கு மலைச்சரிவு பகுதிகள், வடக்கு, வடமத்திய, வடமேற்கு மற்றும் தெற்கு மாகாணங்கள் மற்றும் திருகோணமலை மாவட்டங்களில் சில நேரங்களில் மணிக்கு 30–40 கிமீ வேகத்தில் பலத்த காற்று வீசக்கூடும் எனவும் தெரிவிக்கப்பட்டுள்ளது.
இடியுடன் கூடிய மழையின் போது ஏற்படக்கூடிய திடீர் பலத்த காற்று மற்றும் மின்னல் தாக்கத்திலிருந்து பாதுகாப்பாக இருக்க பொதுமக்கள் முன்னெச்சரிக்கை நடவடிக்கைகளை எடுத்துக்கொள்ளுமாறு கேட்டுக்கொள்ளப்பட்டுள்ளது.
