கட்டுநாயக்க பண்டாரநாயக்கா சர்வதேச விமான நிலையத்தில் (BIA) ரூ. 6.6 மில்லியன் மதிப்புள்ள வெளிநாட்டு சிகரெட்டுகளை இலங்கைக்குள் சட்டவிரோதமாக கொண்டு வர முயன்ற மூன்று சீன வணிகர்கள் சுங்கத்துறையினரால் கைது செய்யப்பட்டுள்ளனர்.

சுங்க அதிகாரிகள் தெரிவித்ததாவது, 31, 36 மற்றும் 40 வயதுடைய மூவரும் இன்று (25) அதிகாலை Green Channel வழியாக பொருட்களை அறிவிக்காமல் கடந்து செல்ல முயன்றபோது கைது செய்யப்பட்டனர்.

மேலும் மேற்கொண்ட விசாரணைகளில், குறித்த சிகரெட்டுகள் சீனாவில் இருந்து வாங்கப்பட்டு மலேசியாவின் குவாலாலம்பூர் வழியாக இலங்கைக்கு கொண்டு வரப்பட்டதாகவும், அவை ஆறு பயணப்பைகளில் மறைத்து வைக்கப்பட்டிருந்ததாகவும் தெரியவந்துள்ளது.

சுங்க அதிகாரிகள் மேற்கொண்ட சோதனையில் 202 கார்டன்களில் சுமார் 40,000 சிகரெட்டுகள் கண்டுபிடிக்கப்பட்டன. முழு சரக்கு மதிப்பு சுமார் ரூ. 6.6 மில்லியன் என மதிப்பிடப்பட்டுள்ளது.

கைதுசெய்யப்பட்ட மூவரும் தற்போது கட்டுநாயக்க சுங்கத்துறையின் காவலில் வைக்கப்பட்டுள்ளதுடன், சம்பவம் தொடர்பான மேலதிக விசாரணைகள் நடைபெற்று வருகின்றன.