Sri Lanka Cricket நிறுவனம் தங்களுக்கு நிதி நெருக்கடி ஏற்பட்டுள்ளதாக வெளிவந்த செய்திகளை முழுமையாக மறுத்துள்ளது.
அண்மையில் விளையாட்டுத்துறை அமைச்சரால் நியமிக்கப்பட்ட கிரிக்கெட் மாற்றக் குழுவை (Cricket Transformation Committee) குறித்து வெளிவந்த தகவல்களை அடுத்து, நிறுவனம் இவ்வாறு விளக்கம் வழங்கியுள்ளது.
அந்த குழு நியமனம் விளையாட்டு சட்டம் எண் 25 (1973) இன் பிரிவு 32 மற்றும் 33 இன் கீழ் மேற்கொள்ளப்பட்டதாகவும், அதன்படி நிர்வாகம் மற்றும் நிதி அதிகாரங்கள் அனைத்தும் அந்தக் குழுவிற்கு வழங்கப்பட்டுள்ளதாகவும் தெரிவிக்கப்பட்டுள்ளது.
மேலும், இது அரச வர்த்தமானியில் (Gazette) வெளியிடப்பட்டதால், அந்தக் குழு நிறுவனத்தின் அனைத்து நிர்வாக மற்றும் நிதி நடவடிக்கைகளையும் மேற்கொள்ள சட்ட அதிகாரம் பெற்றுள்ளது என SLC கூறியுள்ளது.
தினசரி செயல்பாடுகள் வழக்கம்போல் நடைபெற்று வருவதாகவும், வீரர்கள், ஊழியர்கள், சேவை வழங்குநர்கள் உள்ளிட்ட அனைவருக்கும் கட்டணங்கள் நேரத்துக்கு வழங்கப்பட்டு வருவதாகவும் நிறுவனம் உறுதிப்படுத்தியுள்ளது.
