Centre for Policy Alternatives (CPA) வெளியிட்ட புதிய கொள்கை அறிக்கையின்படி, இந்தியாவையும் இலங்கையையும் இணைக்கும் நிலப்பால (Land Bridge) திட்டம் இலங்கைக்கு பாரிய பொருளாதார முன்னேற்றத்தை உருவாக்கும் வாய்ப்பு உள்ளதாக தெரிவிக்கப்பட்டுள்ளது.
“Bridging the Palk Strait: Assessing Indo-Lanka Land Connectivity” எனப் பெயரிடப்பட்டுள்ள இந்த ஆய்வு அறிக்கையை ஷஹானே டி சில்வா தயாரித்துள்ளார்.
இதற்கிடையில், Santosh Jha அண்மையில் கொழும்பில் நடைபெற்ற Global Innovation and Leadership Summit நிகழ்வில் கருத்து வெளியிடுகையில், இந்தியா மற்றும் இலங்கை இடையே நேரடி நில இணைப்பு இல்லாதது “ஒரு அசாதாரண நிலை” என குறிப்பிட்டதுடன், இத்திட்டத்தின் பொறியியல் மற்றும் வர்த்தக சாத்தியக்கூறுகள் மிகவும் வலுவானவை என தெரிவித்திருந்தார்.
அறிக்கையின்படி, இந்தியாவின் தனுஷ்கோடி மற்றும் இலங்கையின் தலைமன்னார் இடையே சாலை மற்றும் ரயில் இணைப்புடன் கூடிய நிலப்பாலம் அமைக்கப்பட்டால், பயணம் மற்றும் சரக்கு போக்குவரத்து நேரம் கணிசமாக குறையும் என கூறப்பட்டுள்ளது.
தற்போது கடல் மார்க்கமாக 40 முதல் 122 மணி நேரம் வரை எடுக்கும் சரக்கு போக்குவரத்து, நிலப்பாலம் அமைக்கப்பட்டால் சுமார் 9 மணி நேரத்திற்குள் முடிக்கப்படலாம் என அறிக்கையில் குறிப்பிடப்பட்டுள்ளது.
மேலும், Port of Colombo துறைமுகத்தின் போட்டித்திறனை அதிகரிக்கவும், இந்தியாவின் கேரளாவில் உருவாக்கப்பட்டுள்ள Vizhinjam Port போன்ற புதிய துறைமுகங்களுடன் போட்டியிடவும் இந்த திட்டம் உதவும் என கூறப்பட்டுள்ளது.
வடக்கு, கிழக்கு மற்றும் வடமத்திய மாகாணங்களில் பொருளாதார வளர்ச்சிக்கும் இந்த திட்டம் வாய்ப்பளிக்கும் என்றும், தென் இந்தியாவின் பொருளாதாரத்துடன் நேரடி வணிக மற்றும் உற்பத்தி இணைப்புகள் உருவாகலாம் என்றும் அறிக்கை சுட்டிக்காட்டுகிறது.
2034ஆம் ஆண்டுக்குள் ஒரு டிரில்லியன் அமெரிக்க டொலர் பொருளாதாரமாக மாறும் என எதிர்பார்க்கப்படும் தமிழ்நாட்டுடன் தொழில்துறை மற்றும் விநியோக சங்கிலி ஒருங்கிணைப்புக்கு இது வாய்ப்பாக அமையும் என்றும் கூறப்பட்டுள்ளது.
அதேவேளை, Palk Strait பகுதியில் உள்ள கடல் உயிரியல் அமைப்புகள் மற்றும் Adam’s Bridge சுற்றியுள்ள சுற்றுச்சூழல் அமைப்புகள் பாதிக்கப்படக்கூடும் என எச்சரிக்கப்பட்டுள்ளது.
எனவே, திட்டம் முன்னெடுக்கப்படுவதற்கு முன் விரிவான சுற்றுச்சூழல் தாக்க மதிப்பீடு மேற்கொள்ளப்பட வேண்டும் என்றும், கடத்தல் மற்றும் சட்டவிரோத எல்லைச் செயல்பாடுகளை கட்டுப்படுத்த வலுவான எல்லை பாதுகாப்பு முறைமைகளும் அவசியம் என அறிக்கை பரிந்துரைத்துள்ளது.
