சில அரிசி வகைகளின் பற்றாக்குறை மற்றும் கருப்புச் சந்தை விலை உயர்வை கட்டுப்படுத்த, அரிசி இறக்குமதி செய்ய வேண்டிய நிலை உருவாகலாம் என அவசிய சேவைகள் ஆணையாளர் ஜெனரல் பி.கே. பிரபாத் சந்திரகீர்த்தி தெரிவித்துள்ளார்.
இன்று (26) அரசு தகவல் திணைக்களத்தில் நடைபெற்ற ஊடக சந்திப்பில் அவர் இதனை குறிப்பிட்டார்.
சம்பா மற்றும் கீரி சம்பா அரிசிகள் கட்டுப்பாட்டு விலையை விட அதிகமாக விற்கப்படுகின்றன என்ற தகவல்கள் குறித்து கேட்கப்பட்ட போது, இந்த நிலைமை கடுமையான பிரச்சினையாக மாறியுள்ளது என அவர் கூறினார்.
மேலும், சில பகுதிகளில் கீரி சம்பா உள்ளிட்ட அரிசி வகைகள் கிடைக்காத நிலையும், கிடைத்தாலும் கருப்புச் சந்தை விலையில் மட்டுமே விற்கப்படுகின்றன என்றும் தெரிவித்தார்.
இந்த விடயம் உணவு பாதுகாப்புக் குழுவில் விவாதிக்கப்பட்டுள்ளதாகவும், குறிப்பாக நாட்டில் தற்போது அறுவடை காலம் நடைபெற்று கொண்டிருக்கும் நிலையிலும் இந்நிலை கவலைக்குரியது என்றும் அவர் சுட்டிக்காட்டினார்.
“இந்த நிலை தொடர்ந்து நீடித்தால், கருப்புச் சந்தை விலைகளை கட்டுப்படுத்த அரிசி இறக்குமதி செய்ய நடவடிக்கை எடுக்க வேண்டிய சூழ்நிலை ஏற்படலாம்,” எனவும் அவர் தெரிவித்தார்.
