இலங்கைக்கு 2026 ஆம் ஆண்டு ஏப்ரல் மாதத்தில் வெளிநாடுகளில் பணிபுரியும் தொழிலாளர்களிடமிருந்து 767.9 மில்லியன் அமெரிக்க டொலர் பண அனுப்பீடு கிடைத்துள்ளதாக இலங்கை மத்திய வங்கி (CBSL) வெளியிட்டுள்ள சமீபத்திய தரவுகள் தெரிவிக்கின்றன.
இத்தொகை, 2026 மார்ச் மாதத்தில் பதிவான 814.8 மில்லியன் அமெரிக்க டொலருடன் ஒப்பிடுகையில் குறைவாக இருந்தாலும், 2025 ஏப்ரல் மாதத்தில் கிடைத்த 646.1 மில்லியன் அமெரிக்க டொலருடன் ஒப்பிடுகையில் குறிப்பிடத்தக்க உயர்வாகும்.
மேலும், 2026 ஏப்ரல் மாத இறுதிக்குள் இலங்கையின் மொத்த உத்தியோகபூர்வ வெளிநாட்டு கையிருப்பு 6.759 பில்லியன் அமெரிக்க டொலராக மதிப்பிடப்பட்டுள்ளதாக மத்திய வங்கி தெரிவித்துள்ளது. இதில் சீன மக்கள் வங்கியின் (PBOC) நாணய பரிமாற்ற ஒப்பந்தத்தின் வருவாயும் அடங்குகின்றது.
இதனுடன், 2026 மே 08 ஆம் திகதி வரையிலான கணக்கீட்டின் அடிப்படையில், இலங்கை ரூபாயின் பெறுமதி அமெரிக்க டொலருக்கு எதிராக 3.6 சதவீதம் வீழ்ச்சியடைந்துள்ளதாகவும் மத்திய வங்கி குறிப்பிட்டுள்ளது.
சுற்றுலாப் பயணிகளின் வருகை 2026 ஏப்ரல் மாதத்தில் 135,643 ஆக பதிவாகியுள்ளது. இது மார்ச் மாதத்தில் பதிவான 183,979 வருகைகளையும், 2025 ஏப்ரல் மாதத்தில் பதிவான 174,608 வருகைகளையும் விட குறைவாகும்.
அதேவேளை, உள்நாட்டு வெளிநாட்டு நாணய சந்தைக்கு மத்திய வங்கியால் வழங்கப்பட்ட நிகர வெளிநாட்டு நாணய அளவு 2026 ஏப்ரல் மாதத்தில் 13 மில்லியன் அமெரிக்க டொலராக இருந்ததாகவும் தெரிவிக்கப்பட்டுள்ளது.
