திருட்டு, கடத்தல் மற்றும் பலவந்தமாக பணம், நகை உள்ளிட்ட மதிப்புள்ள பொருட்களை பறிக்கும் குற்றச்செயல்கள் தொடர்பாக இலங்கை பொலிஸார் பொதுமக்களுக்கு விசேட எச்சரிக்கை அறிவிப்பு வெளியிட்டுள்ளனர்.
பொதுமக்களின் பாதுகாப்பை உறுதிப்படுத்த தொடர்ந்து நடவடிக்கைகள் மேற்கொள்ளப்பட்டாலும், கவனக்குறைவு மற்றும் விழிப்புணர்வு இல்லாமை காரணமாக சில கடுமையான சம்பவங்கள் இடம்பெற்று வருவதாக பொலிஸார் தெரிவித்துள்ளனர்.
அதற்கான எடுத்துக்காட்டாக, அண்மையில் கொக்கட்டிச்சோலை பகுதியில் இடம்பெற்ற சம்பவத்தில், இரண்டு பெண்கள் கடத்தப்பட்டு மயக்க மருந்து கொடுத்து நகைகள் பறிக்கப்பட்டதுடன், ஒருவரை கொலை செய்த சம்பவமும், மற்றொருவர் குறுகிய வித்தியாசத்தில் உயிர் தப்பிய சம்பவமும் குறிப்பிடப்பட்டுள்ளது.
இத்தகைய சம்பவங்களை அடிப்படையாகக் கொண்டு, பொதுமக்கள் கீழ்கண்ட விடயங்களில் அதிக கவனம் செலுத்துமாறு பொலிஸார் அறிவுறுத்தியுள்ளனர்:
🔹 குற்றவாளிகள் பொதுமக்கள் இடங்களிலும், பொதுப் போக்குவரத்திலும் மிக நெருக்கமானவர்களாக நடந்து நம்பிக்கை பெற முயற்சிப்பர்.
🔹 நண்பர்களாக நடித்து நெருக்கம் ஏற்படுத்துவர்.
🔹 மிட்டாய், சாக்லேட், உணவு, பானம் போன்றவற்றில் மயக்க மருந்து கலந்து வழங்குவர்.
🔹 விஷ வாயு ஸ்ப்ரே, மிளகாய் தூள் போன்றவற்றை பயன்படுத்தி தாக்குதல் நடத்துவர்.
பொதுமக்களுக்கு வழங்கப்பட்ட முக்கிய அறிவுறுத்தல்கள்:
✔ அறிமுகமற்ற நபர்கள் வழங்கும் போக்குவரத்து வசதிகளை ஏற்க வேண்டாம்
✔ அந்நியர்களிடமிருந்து எந்தவொரு உணவு அல்லது பானத்தையும் ஏற்க வேண்டாம்
✔ சந்தேகத்திற்கிடமான நபர்கள் அணுகினால் எச்சரிக்கையுடன் இருங்கள்
✔ பணம், நகை மற்றும் மதிப்புள்ள பொருட்களை பாதுகாப்பாக வைத்திருங்கள்
✔ சந்தேகமான நபர்கள், வாகனங்கள் அல்லது சம்பவங்கள் குறித்து உடனடியாக 119 / 118 அல்லது அருகிலுள்ள பொலிஸ் அதிகாரிகளுக்கு தகவல் வழங்குங்கள்
இந்த எச்சரிக்கைகளை சரியாக பின்பற்றுவது மூலமே குற்றச்செயல்களைத் தவிர்க்க முடியும் என இலங்கை பொலிஸார் வலியுறுத்தியுள்ளனர்.
